2004 წელს, როცა "ლენდროვერმა" Discovery-ს მესამე თაობა წარმოადგინა, ვეღარავინ თქვა ის, რასაც ინგლისურ ავტომობილებზე ზოგადად ამბობდნენ ხოლმე. უგზოობის ბრიტანულმა ავტომობილმა ჯერ დიდი და დაკუთხული ფორმებით მოგვხიბლა, მერე კი საკმაო გამძლეობითაც, რასაც მის წინამორბედებზე ვერ ვიტყოდით.
ჩვენს ნაფეისლიფტარ მოდელს (2009 წლიდან) Discovery 4-ს უწოდებენ ხოლმე, მაგრამ რეალურად Discovery 3 გახლავთ - ოღონდ Typ LA. ეს, რათქმაუნდა, ფეისლიფტზე მეტი იყო, მაგრამ მაინც - მიიღო ახალი ცხაურა და ახალი მაშუქები. სალონში
რაც მთავარია, ბოლოსდაბოლოს, Discovery-მ სწორედ მაშინ მიიღო სათანადო ძრავა: 2,7 ლიტრი მოცულობის V6 დიზელი 3.0 V6-მა შეცვალა, რომელსაც 440-ის ნაცვლად უკვე 600-ნიუტონმეტრიანი მაბრუნებელი მომენტი ჰქონდა. ეს გახლდათ 2,6 ტონაზე მეტი წონის მქონე ყველგანმავლის გაცილებით უკეთესი შესრულება.
2011 წლიდან კიდევ რაღაცები შეიცვალა. სიმძლავრის 245-დან 256 ცხენის ძალამდე გაზრდა განსაკუთრებული ამბავი არ ყოფილა. სამაგიეროდ, მნიშვნელოვანი სიახლე გახლდათ ZF-ის 8-საფეხურიანი ავტომატური გადაცემათა კოლოფი, რომელმაც 6-საფეხურიანი ჩაანაცვლა და რომლის წყალობითაც, 100 კილომეტრზე საშუალოდ 1 ლიტრი დიზელი იზოგებოდა. თუმცა, 6-საფეხურიანი კოლოფითაც საკმაოდ ნორმალურად დადის. სავალი ნაწილიც უნაკლოდ მუშაობს. თუ მის შეძენას გადაწყვეტთ, აუცლებლად შეამოწმეთ შემდეგი: ძარის ასაწევად კომპრესორს წესით რამდენიმე წამი უნდა დასჭირდეს. თუ დიდხანს გრძელდება და ხმებსაც გამოსცემს, მალე ახლის შეძენა დაგჭირდებათ, რაც ძალიან ძვირი სიამოვნებაა. კარგად შეამოწმეთ დინამოც, რომელიც მალე კვდება ხოლმე. ჩვენს სატესტო ეგზემპლარს 290 000 კილომეტრი ჰქონდა გავლილი, მაგრამ დეფექტი ვერ აღმოვუჩინეთ. თუმცა სიფრთხილე გმართებთ: ამ მანქანას გარბენის ჩამომყრელები ეტანებიან!
DISCOVERY 4 მესამე თაობის სერიოზული ფეისლიფტია
"ლენდროვერმა" ეს ავტომობილი მრავალმხრივ გააუმჯობესა, თუმცა ელექტროობაში გარკვეული პრობლემები მაინც დარჩა. ხშირად ფუჭდება უკანა მინის საწმენდი, საბარგულის კარის საკეტი, შუშების ელ. ამწევები.
შედარებით იშვიათია, მაგრამ მაინც: ძრავამ, გადაცემათა კოლოფმა და მანაწილებელმა კოლოფმა, შესაძლოა, ზეთი დაიკლოს. ამიტომ, შეძენის წინ, ქვემოდან ყველაფერი კარგად უნდა შეამოწმოთ. ავტომობილის დიდი წონა სავალი ნაწილის, საბურავებისა და მუხრუჭების სწრაფ ცვეთას იწვევს.
